Novo Lúa 5. Lingua e Literatura

Ao longo do tempo todo vai mudando ao redor en función dos gustos e das necesidades de cada época. Así van cambiando as formas de vestir, a vivenda, as rúas, os edificios, o transporte… Observa ben as fotos: pasaron moitos anos e moitas cousas cambiaron. Novos inventos, avances tecnolóxicos e novas construcións sen os cales hoxe case que nos parece imposible vivir.

A natureza é unha das cousas máis valiosas que temos e hai que coidala. É algo que todos sabemos pero non sempre cumprimos e as consecuencias nalgunha parte do mundo son xa irreversibles. A reciclaxe de residuos é un dos graíños de area que cada familia pode achegar para controlar a contaminación da natureza.

Os anuncios publicitarios son pequenas obras de arte que pretenden que consumamos un determinado produto ou que cambiemos a nosa conduta. Moitos e moi variados son os elementos empregados nos anuncios para captar a nosa atención, ás veces levándonos a engano, por iso é moi importante que aprendamos a reflexionar sobre eles.

O alcalde e mais os concelleiros forman a Corporación Municipal, que é a administración máis próxima aos cidadáns e cidadás e onde lles deben dar solución aos nosos problemas máis inmediatos. A Corporación Municipal e todos os empregados públicos do concello son os encargados de lles dar aos cidadáns e cidadás aqueles servizos básicos que fan que a nosa vida, tanto na vila coma na cidade, sexa máis cómoda.

A nosa sociedade actual consome máis do que precisa e os medios de comunicación aproveitan calquera situación para fartarnos de publicidade sobre produtos que semellan imprescindibles na nosa vida. Nestas datas parece obrigado mercar, regalar, ir ás rebaixas ou comer, e os centros comerciais convértense en lugares ateigados de xente. [...]

Lembro o que aprendín: primeiro trimestre

Hai unha frase popular que di que quen ten un amigo ten un tesouro. Moitas veces dos amigos non precisamos case nin falar para sentirnos comprendidos, e aínda que algunhas veces pelexemos, sempre se acaban arranxando as cousas. No cine e na literatura aparecen historias de amizade de moitos tipos: amigos cariñosos, amigos que discuten todo o tempo, amigos que pasan xuntos aventuras…

A risa considérase unha das mellores solucións aos nosos problemas cotiáns xa que é capaz de cambiar o noso estado de ánimo. Cando estamos tristes, a risa axúdanos a sobrepoñernos. Outras veces, un sorriso axúdanos a seguir adiante, a ser mellores, a tomar as cousas con mellor humor… Todas as correntes da medicina actual están de acordo en que a risa é unha das mellores formas de cura. [...]

Desde sempre o ser humano soñou con explorar e dominar novos mundos. Explorado o planeta Terra, o soño era a conquista do espazo exterior e ver se a vida era posible noutros planetas. Logo de experimentar con animais para ver como reaccionaban, en 1961 comezaron os voos espaciais tripulados por persoas. [...]

Desde sempre o ser humano aproveitou os recursos da natureza na procura de alimentos, sendo o mar unha das fontes máis importantes para obter eses alimentos. Para iso fóronse desenvolvendo diversas técnicas para a captura dos recursos mariños. Hoxe en día a pesca (e o marisqueo) amais de ser unha importante actividade económica, converteuse nunha actividade de recreo e de lecer. Galicia conta cunha importante actividade pesqueira.

Todos os días podemos ler nos xornais que moitos anciáns viven en soidade sen ninguén que os coide e necesitan dos servizos sociais para que os axuden cos labores da casa. Afortunadamente non sempre é así e moitas familias conviven cos seus maiores. Unha das relacións máis especiais que existe é a dos avós cos seus netos: o neto aprende das súas raíces a través das historias dos avós e o avó está feliz co rebulir dos nenos ao seu carón.

Lembro o que aprendín: segundo trimestre

No ano 1895 os irmáns Lumière mostráronlle ao público de París a primeira cámara de cine. A imaxe era en branco e negro e non tiña son. Aínda así, todos os que acudían a ver unha película quedaban sorprendidos ante as primeiras imaxes en movemento. Na actualidade, a tecnoloxía dixital permite acadar efectos especiais e sons sorprendentes, pero a reacción das persoas que van ao cine por primeira vez segue a ser a mesma. É algo máxico.

O xornal é un dos medios máis antigos e universais de transmisión de noticias e segue vixente en todo o mundo. Cada xornal expón os acontecementos que ocorren cada día desde un punto de vista diferente, por iso temos que aprender a ler as noticias dun xeito crítico. As distintas seccións dun xornal (información local, rexional, nacional, internacional, sucesos, cultura, deportes, programación de TV, pasatempos, etc. [...]

A cociña é unha das características que máis identifica unha cultura. En Galicia temos a sorte de contar, ademais da gastronomía, cun idioma e cun folclore propios que axudan a manter viva a nosa identidade. Moitas das receitas aquí representadas só teremos oportunidade de probalas se temos unha avoa na casa disposta a cociñar ou se acudimos a unha festa gastronómica. [...]

Desde os tempos máis remotos o ser humano precisou de diferentes animais para que o axudasen nos labores do campo, como medio de transporte ou como fonte de alimentación. A través dun proceso de adestramento estanse a utilizar as capacidades dalgúns cans para labores de salvamento, guía de persoas cegas, detección de explosivos… Con todo, a relación do ser humano cos animais non sempre é boa e aparecen casos de abandono.

A profesión dalgunhas persoas é facer de axuda aos demais. Son moitas as ONG (organizacións non gobernamentais) que se dedican a intentar mellorar a calidade de vida das xentes dos países en desenvolvemento. [...]

Lembro o que aprendín: terceiro trimestre